Voce Ventu - Cuncerti di i 20 anni di u gruppu.

Sò stati parechji i  gruppi à  nasce  in l'anni  nuvanta è  chì sò appena cum'è i  "figlioli"  di  i  primi gruppi di u  riacquistu.  Pè  a più gran parte  sò custituiti di giovani cantadori chì sò ingrandati incù i dischi  di Canta, I Muvrini, I Chjami,  A  Filetta o ancu i Surghjenti per  ùn  cità  cà  i più impurtanti.


Voce Ventu hè  unu  di  quessi, è  hè  per mè  quellu chì  ci  offre u  travagliu interessante u  più .

Prima per via  di a qualità  di  e so  criazione,  di e so voce, di l'accunciamenti musicali è dinù per via di  a qualità  di  i  sò  arrigistramenti – l'ultimu CD hè una maraviglia. Sta qualità  si  ritrova dinù inde i so cuncerti. L'avarete capita, attalintati sò, ma u talente s'ellu ùn hè micca sirvutu  da un minimu di travagliu, si guasta. Elli anu i  dui.

A siconda  ragione chì face di Voce  Ventu  u più  bellu gruppu  di st'ultimi vint'anni  è  ch'elli si  scrivenu propiu in la cuntinuità di ciò  ch'elli  fecenu i  so maiò,  ma  senza  cascà  inde a trappula di l'imitazione. Ch'elli appiinu statu  assai à sente  Canta, i Chjami  o a  Filetta si vede subitu, ma a musica ch'elli  ci pruponenu hè  dinù  è  soprattuttu soia. Un  antru gruppu chì  l'avarà influenzati assai di sicuru, sò i Quilapayun, sò veri passiunati  di  stu  gruppu è quessa dinù  si  sente.

Hè  difficiule di  truvà  un difettu à  stu  gruppu, ma  eiu , li n'aghju da truvà  unu : u  so  difettu maiò  hè  di ùn  avè  fattu cà  dui dischi in 20 anni, è  pochi cuncerti. A spiicazione vene  forse  da u fattu ch'elli sò  "amatori" è  chì quand'ell'hè  cusì,  quandu  ognunu deve dà  capu  à e so faccende, à  e so  rispunsablità  famigliale è prufiziunale ùn  hè  micca data  à tutti  di pudè  caccià  un  dischettu tutti i  dui  o trè   anni. Rimarcate chì s'ellu hè per  fà dischi  di a  qualità  di i  so  dui primi, simu pronti ad aspittà  torna qualchì annu... festina lente.

Ma piazza  à  a musica è  à  unipochi di stratti di i so cuncerti aiaccini  di u mese  d'ottobre 2015  per fistighjà  i  vinti anni di u gruppu.

Vi ne mettu una piccula  selezzione:



Duie canzone per  cumincià:  

"Da u sperà "ispirata da  una  canzona di I Cori di l'armata rossa pè a BO di u filmu  The Hunt For Red October – incù Sean Connery( https://www.youtube.com/watch?v=5qowkuqH9lE  )

 è " Palinsestu" ripresa di una canzona di Quilapayun ( http://www.quilapayun.com/canciones/palimpsesto.php ):



S'ellu  si tace u  cantu ( sta canzona ne  dice  assai  annant'à l'impegnu  di Federicu Poggi inde  u  gruppu )  :



Aghju parlatu anzora di a qualità  di e  voce, ci  vole  à sapè  chì  dui puntelli impurtanti di Voce Ventu, Federicu Sini è Anthony Geronimi anu chitatu u  gruppu dopu l'arrigistramentu di u sicondu  discu  –  chì d'altronde ùn  l'anu micca pussutu  difende  annant'à  a scena – è senza  isse duie billissime  voce l'avvene  di u  gruppu paria  bellu foscu. Era senza  cuntà annant'à  u  talente di i trè  cantadori chì l'anu  righjuntu ultimamente : Lionel Giacomini, Dumenicu Casalonga è Ghjuvan Filippu Martini.

A  carta nera  cantata da Lionel Giacomini



L'ale di l'accunsentu cantata da Ghjuvan Filippu Martini  (a siconda canzona, a prima hè  cantata  da Saveriu Tavera chì  hè un anzianu  di u  gruppu)



A morte  di  Vanina cantata  da Dumenicu Casalonga




Torna  a listessa canzona ma  stavolta cantata  da Mariu Capaï chì ci eranu ancu l'invitati:



un antru invitatu  Petru Santu Guelfucci, chì ci canta  " Ùn t'abbandunaraghju " :



Eppo' ci  era invitatu  anch'eiu è m'avianu  incaricatu  di cantà u so  " tubu" A Serva, hè un  bellu  rigalu ch'elli m'anu fattu è  in listessu tempu  un onore  è  devu  ricunnosce  ch'avia  a pressione.




Sti  dui  cuncerti  funu  dinù l'uccasione  per elli di prisintacci qualchì nuvità:


O Generale – ch'e  trovu magnifica – :



L'aghjalesa (umaggiu a i  Chjami) :



Ti vecu a mio bandera:


Eccu, pensu  ch'elle  vi saranu piaciute  ste canzone  scelte. S'ell'hè  u  casu  è  s'è vo ùn  cunnisciate micca stu  gruppu v'invitu à scopre  l'altre canzone – ci n'hè parechje annant'à Internet – è  à   cumprà i so dischi.  

intantu, eccu a playlist d'Isulamatre incù tutti i stratti di issi cuncerti aiaccini filmati da Jean-Antoine Mambrini:

https://www.youtube.com/playlist?list=PLJV7VmchDHyJez53UMoCTwJkEyQzkFJIZ