Chjama à a spunga

Chjamà  vogliu quella spunga
È a mio musa l'invita
Sò cuntentu ch'ella ghjunga
Incicciata è  culurita
Ma s'ella si face torce
Sarà  prestu  incurnittita  

Quissa hè vera o caru amicu
Avà sò palesi i fatti
Ma pà vulè storce à Bob
Ci vole à essa belli matti
Chì s'è a spunga hè rotta
Ùn si pò lavà i piatti!!

Eiu ùn parlu micca à tortu
È a mio musa ùn si stracqua
O Bobbì s'e t'aghju tortu
Stata hè per cacciatti l'acqua
È cusì attempu ghjuntu
Fusti subitu sprimuntu

Quissu dettu ùn hè ghjustu
Ùn sò veri'ssi filari
Manc'appena sò asciuttu
È vogliu schjarì l'affari
Chì Bobbì in i so stacchi
Hà tutta l'acqua di u mari!

Tutta l'acqua  di u mare
Eiu  a  t'avaria porsa
Quì  e turnate sò  care
Chì si beie acqua corsa
Abbasta chì per pagalle
Tù ùn appii  zini in borsa

Eiu ùn aghju zini in borsa
Quissa hè bella chè capita
Ma quissa l'acqua ùn si bii
Ch'hè veramenti salita
È s'ella hè troppu cara
Ci staremu à l'acquavita

Allora s'ella hè cusì
Stappemuci una buttiglia
È stasera o Bobbì
À chì ne piglia ne piglia
L'acquavita hè a più bona
Megliu cà l'acqua di Zilia

L'acquavita hè a più bona
A sanu in la tarra intera
È quand'ella veni l'ora
A ci sciacchemu à biera
Ma stasera ùn ti ne fà
Chì a prima ghjè a mea!

Avà sì ch'aghju capitu
Chì n'emu pè una stonda
Ùn avemu ancu finitu
Faremu a tribizonda
Chì s'è tù metti a prima
Mittaraghju a siconda

S'è tù metti una siconda
Tandu a sirata ùn hè persa
D'acquavita è di canti
L'aria ne sarà immersa
Ma s'ellu s'affacca un bassu
Sciaccaraghju ancu una terza

Trè buttiglie ? ùn ci hè male!
S'è tù voli ch'e a ti dichi
O Spunga per asciuvalle
Ci vularà ch'è tù nun trichi
Invitemu per ghjutalle
Forse dui o trè amichi?

Di biutalle cù l'amichi
Manc'appena hè un delittu
Chì à capu d'una sola
Ùn possu più marchjà drittu
Chjamaremu à a riscossa
L'amicacciu Caparrittu!!

Eiu butiglie d'acquavita
Solu mi ne sciaccu un paghju
Quessa hè tutta la mio vita
È altri piacè ùn aghju
A terza l'asciuvarete
Cù Sidussincu è l'Erbaghju.

Quand'e socu cù l'amichi
Sò cuntentu è mai scappu
E duie prime o Circiò
E ci scacchemu d'un trattu
Ma di a terza buttiglia
Ùn truvemu mancu u tappu

O ch'è  tù  scia binadettu
Hè una  funa troppu longa
Ch'è tù stia cannellistrettu
È chì a sete  ti ghjunga
Avà  sì chì mi n'arvecu
Ch'è tù  sè a vera  spunga. :drunken:

Hè vera sogu una spunga
Quissa ugnunu a pò capì
È ùn temu mai nunda
Quand'ellu ci vol'à pulì
Chì da l'attrachju à l'albori
Asciuvu acqua è whisky!

T'aghju da dì una cosa
Mi piace à bambuscià
È devi teme qualcosa
O Bobbì o ch'è tù scia
Passu a mio vita cantendu
È tù a passi à struscià

Passu a me vita à struscià
Cù li sforzi i più putenti
Ma anch'eiu sò cantà
Pà fà piacè à a ghjenti
Hè cusì, chì voli fà
Bobbì hè pulivalenti..

U peghju hè chì ti pare
D'avella sta cumpetenza
Asciuvi piatti è cuchjare
Eccu a to pulivalenza
Inquant'à mè in Calviani
O Bob ci ai una lenza...

Hè vera ciò ch'è tù dici
Incù a to rima nova
T'aghju una bella lenza
È ti ne daraghju a prova
À rombu di lavà piatti
Cantu ma cum'a paghjola :silent:

Quant'è tù trichi à risponde
Iquant'à mè voli ch'e parti
Guarda chì e fune longhe
Spessu diventanu sarpi
Sarà megliu ch'è t'asciuvi
I piatti cupputi o sparti

Forse t'ai a raghjò
Pà cantà ùn sò dunatu
Quissa a sai o Circiò
Pocu fà aghju principiatu
Ma quì piatti ùn asciuvu
Chì ùn aghju ancu magnatu

Stu donu per ch'è tù l'appii
Ùn cunnoscu u rimediu
Per ciò di lavà i piatti
Cerca à fà à bella megliu:
Eiu aghju fattu cena
Dunque asciuvarè u eiu

Lavaraghju u to piattu
O amicu ùn ti ne fà
È pà ringrazià ssu fattu
Cunnosci u prezzu à pagà
Eiu sbarazzu a to tola
Ma tù m'ampari à cantà

Cappia appena sta ghitara
Eppo' veni à u più prestu
Quì ci hè furcina è cuchjara
Lavarè ancu u restu
È pè u cantu o Bobbì
Ùn fà micca u mudestu