Chjama à a spunga

U to dettu o Circiò
Mi faci assai piacè
Lavaraghju i to piatti
Strufinendu à più pudè
Ma ghitarra ùn ne aghju
Chì ghjè un iukulélè!

Allora simu affullati
Cun quellu strumentu stranu
Saranu prestu intrunati
Quelli chì à sente ti stanu
Cappia puru sta ratachja
Ch'e ùn la ti vechi più in manu

Mi sò intesu chjamà
A vede s'ella t'aiuta
Stuzzicheremu la musa
Ma a spunga si stà muta
Mi pare chì per stu pocu
Hè stata bella sprimuta

A spunga ùn hè sprimunta
Quissa ùn hè micca vera
A raghjò a v'aghj'a dà
Sappiati chì arrisera
Eiu ùn pudiu risponda
Chì ùn eru in casa mea..

s'ella ùn era in casa soia
a nostra spunga l'altr'eri
ghjè chì l'anu tramutata
in lavatoghji fristeri
in paese di u Mucale
per lavà piatti è bichjeri

L'ai detta o Caparrì
A to rima hè propiu ghjusta
Lavatu aghju tanti piatti
Carchi à carri, pomi è frutta
Ma à rombu d'asciuvà
Feghja chì a spunga hè frusta

hè vera chì a guardalla
a spunga hè pocu bella
ghjè tutta bianca è più gialla
chì l'hà rosa a sgiavella
oramai hè ghjunta l'ora
di ghjittalla à a pubbella !!

Da tuttu u lavatoghju
I to versi sò intesi
Chì a spunga hè bella rosa
Da a sgiavella è i mesi
In più porta i calzetti
Cù i culori francesi.. :shock:

Cù e to calzette francese
È la to ghitarra in manu
Scusami s'e a ti dicu
Ma sì u veru andaccianu
Ùn ti mancanu chè e sandule
È pari un turristu alimanu

Avà sì ch'ai capitu
Quali sò incù sta fiura
Sogu una spunga alimana
Un scherzu di a natura
Chì straziu lavendu piatti
Ma dormu in a me vittura :suspect:

Stà à sente i mio cunsigli
Ch'ùn ci n'hè cum'è i mei
Hà da ghjunghje l'istatina
Prestu in trè è trè sei
Incù tamante calzette
Ai da avè caldu à i pedi

Ripigliemu o zitelli
Postu ch'e ci simu tutti
E furcine i cultelli
È i piatti sò asciutti
L'hà richjarati A Spunga
Eppuru eranu brutti

Hè vera erani brutti
A dicu è sò sinceru
Ma stasera sò vultatu
À lavà piattu è bichjeru
A facciu sempri di cori
Postu ch'hè u me mistieru

O  spungaccia maladetta
Capiscu  ch'è  tù  ti piatti
Ma  faraghju  a vindetta
Cun tè  ùn facciu più patti
Forse a t'anu ancu  detta
M'aghju  compru un lavapiatti   :tongue:

O chì bruttu tradimentu
A sintenza hè infama
Pà Bobby u to amicu
Hè inghjusta a cundanna
Spergu ch'u to lavapiatti
Cascarà pà sempr'in panna!!  :twisted:

Chjappu aghju l'assicuranza
È u creditu hè pacatu
Dunque ùn ai micca ascianza
Avà t'aghju rimpiazzatu
Avà basta ch'è tù canti
S'è t'ai appena di fiatu

Mi scusarè o Bobby
Ci vole ch'e mi pianti appena
Ùn possu stà tantu quì
È mi face assai pena
I zitelli anu a fame
Mi chjamanu per fà cena

Di pettu à u lava piatti
Mancu possu ten'arrittu
Ma s'ellu mi ferma u fiatu
Ùn mi staraghju po zittu
È intantu o Circiò
Ti pregu un bon appitittu!!

Aghju messu l'acqua à bolle
Dopu ci mettu a pasta..
In furia l'aghju da ingolle
Chì stasera si cuntrasta
Bon'appidittu ancu à tè
Magnu è voltu à tene tasta

Cù a rima a più sincera
O amicu ti ringraziu
Di cuntrastà quì sta sera
Vegu chè tù n'ai laziu
Basta solu chì di pasta
Ch'è t'ùn sia troppu saziu