U NOME PIÙ CARU
Datemi un libru, chì u so caru nome
citi una volta sola, è ùn la mi dite,
è u truveraghiu trà la selva folta
di e parolle è di e rime, è trà le spine
selvatiche di i numeri incirliti
cum'è sepali ostili, è trà i pulloni
d'una barbara lingua scunnisciuta.
Datemi un libru, è le mio mani ceche,
cù e so dite disciolte à l'aventura,
truveranu la pagina più bella
senza chì un segnu amicu la distingua.
Cum'è ghjumente da la sete dome,
custì si firmeranu, scosse appena
da u dolce tremu di lu desideriu,
à u pozzu d'ombra duve anc'oghje dorme
l'onda chì sola mi pò dà la vita.
È cumu pò la selva più prufonda,
è a machja ingiuriosa, è a capillera
bastarda di e lamaghje insanguinate
piattà la Sposa à u sposu pelegrinu
ch'insaziatu a seguita in ogni locu ?
ancu in infernu la ritruverebbe,
ancu offesa da i mali è sfigurata
da i patimenti d'una prigiunia
chì disonora l'omu è a so natura !
O dolce nome, o casta fonte, o Donna
di u purissimu amore di a mio mente,
a to presenza ùn m'abbandona mai.
Ancu s'ella hè mutivu d'aspra pena,
un'estrema speranza m'accumpagna
è mi sustene per l'esiliu amaru.
Quandu serà ch'eo veca la to fronte
È e to tempie sfrisgiate da le spine
di u caracutu ch'oghje t'incurona,
ornate da un arditu diadema
di leccia muntagnola è legnudoru ?
O Patria, o Sposa mistica, in tamanta
bassura avemu pientu è spasimatu
chì a salvazione ùn pò mancà. Per seculi,
fin ch'ellu durerà lu sacrifiziu
d'una razza custante d'omi veri,
o Corsica hà da splende lu to nome.
Accueil 
