CHJAMA È RISPONDI IN LINEA 13/02/2014

Ùn ti n'andà micca in lettu
Hà a ragione o Erbaghju
Truvemu un antru sugettu
Unu u ti truvaraghju
Forse quellu di u cignale
Chi u cane tene à l'abbaghju?

  

Chì ci colma d'addisperi
Di lu futbolu lu tema
Ùn ci vidimu più sfieri
È ci scappa la ghjastema
Faremu quant'è i mudderi
Ùn avaremu più tema !

Fiore di Teppa a écrit:

Ghjè prupongu ribillioni
À chì ùn piaci u ballonu
Ch'iddi fùssini lioni
Fieri più chè un paonu
Forsa chì incu Erbaghju
Sta ribillioni faraghju...

Fior' di Teppa ti rispongu
Sempre cù grande piacè
Ai intesu à Sidussincu
Hè anch'ellu cum'è tè
Chì par fà quella rivolta
Avà conta semu trè

Sò ch hè cresciutu u tonu
È ind è mè ùn si face
Dunque dumanda perdonu
Per e ferite è e strasge
U sugettu abbandonu
Eppo vi lasciu a pace

Circione a écrit:

Ùn  ti n'andà micca in lettu
Hà  a ragione o Erbaghju
Truvemu un antru  sugettu
Unu  u ti  truvaraghju
Forse quellu di u cignale
Chi  u cane tene à l'abbaghju?

  

Allora s'ellu hè cusì
Possu cuntintà a fulla
Ma l'affare a sai bè
Hè chì t'ùn ci capisci nulla
Allora incù Tittò
Canta puru u ballò

Ma tù credi o Tittò
Di scappanni cussì in furia ?
Tù ha' trovu lu ballò
Chì hè una cosa scura
Aval'ci voli à buscà
Calcosa da impruvisà !

sidussincu a écrit:

Eiu sò cum'è l'Erbaghju
U ballò un mi ne piace
Pò darsi saraghju capra
Ma custì c'hè pocu à pasce
Calpighjate u tarrenu
Cumu l'arba avarà da nasce ?

Di leghje a to puesia
Eiu e mani mi strufingu
O Sidussì a sapia
Chì t'avia pugne u zingu
Ma tù ghjochi à u CAB
Ed eiu à u Sportingu   

Vi prupongu oravali
Di virsighjà cosa nova
Calcosa di virtuali
Chì FacciaBeccu ci cova
Ghjè un lampu più fiurioni
Chì ghjè "neknuminazioni" ?

Sidussincu hè bellu pienu
Per ùn dì ch'ellu ghjè stufu
Di luserna è di fenu
Di trifogliu è d'alluviu
S'ellu hè spachju lu tarrenu
Manghjerà polvara è tofu

Alè i mo cari amici
Vi lasciu è ùn hè fola
Ne simu stati felici
Ma avà a musa hè sola
Vò à chjinammi in furia
Chì dumane ci hè a scola
  

Tutt'ognunu quì stasera
Dice ch'ellu hà fattu un ponte
Per i pueti i veri
Pensu chì l'ore sò conte
Chì s'elli passanu nantu
Forse l'aspetta Caronte...

sidussincu a écrit:

Tutt'ognunu quì stasera
Dice ch'ellu hà fattu un ponte
Per i pueti i veri
Pensu chì l'ore sò conte
Chì s'elli passanu nantu
Forse l'aspetta Caronte...

S'è t'avessi u talentu
Di marcà un penaltì
Forse chì calcosa tù
Sta sera avarii à dì
Ma sola a mitulugia
Sè vinutu à cantà quì  

In dui  ghjorni Bastia
S'anu chjappu sei punti   
L'Isula nimu  a  cridia
In ottesimi sò ghjunti   
Ma à  ballò ùn  basta micca
D'esse  fini  o  d'esse unti   

Avà  cambiemu  sugettu
Chì emu  fattu lu  giru
Prupunite eiu  v'aspettu
Rittificate u tiru
A sò chì site  capaci
Site  omi  di  rigiru

Di terrenu pocu sò,
A me mi piaci à veda
i spurtivi, s’iddi so
di Bastia o di Bavedda,
artisti di u ballò
o pur’ di l’alta strada.

U tarrenu di u ballò
Hè frustu è desolatu
Ma quellu di a puesia
Stasera hè bellu zappatu
Un hà chè polbara è tofu
O ma induv'e sò cascatu !

Sidussincu è caparrittu
Sò i dui ch'e prifergu
Avà mi vogliu stà zittu
A mo carreia vi cedu
MA di cantà tramindui
In puesia vi chergu

scusate s'è fin'à quì
sò statu appena à l'infora
ghjera nant'u telefonu
ch'ùn era in la mo dimora
per scrive un'impruvisata
mi ci vulia un quartu d'ora

U vostru chjam'è rispondi
Mi pare bellu avanzatu
Ai messu u tavulinu
E lu pianu hè appruntatu
Ma temu ch'a mo carreia
N'appii ancu un pede sigatu !

Ti ringraziu o Caparrì
Pè a to "tilifunata"
Quella di u tofu sì
Chì era una bella strufata
Scrittu ai un bellu missagiu
Cù e to dite di fata   

Sè cascatu in un tarrenu
indu’ ùn ti vicu sicuru
cun u to cantu sgalabatu
Aiò, par ùn essa menu
chè certi altri qui, mò puru
ch’è tù sè u più garbatu

s'ellu ghjè bellu zappatu
da u passeghju di l'omi
pigliemu a zappa à fiamma
è po piantemu li pomi
femu un ortu di quelli
degnu di li nostri nomi

Che vo sgiate abbagliati Ma chi sarà sta primura Vi vegu qui passiunati E mi pigliu di paura D'un vede le nostre rime Tombe da li campiunati

Caparrittu è Sidussincu
Sò dui bravi figlioli
U prima hè Niulincu
È pianta pomi è fasgioli
È u sicondu m'accusa
Di sicà i cavichjoli

O amichi mi ni vocu
è mancu à u galateiu.
Par disgrazia aghju un pocu
di travaddu, chì u meiu
ùn sò i versi, chì poni
piacia solu à i lumaconi.

(A Caparrittu)

Ti lascaraghju piantà
I pomi è ancu i porri
Pigliarei u to tempu
Ma eiu, à corri corri
Saraghju di a puesia
Un fiume chì ghjunghje à sborri !