chjama à i pueti isulani

per spiegavvi u mio pinseru
ùn vale ch'e a m'allonghi
mi pare un fattu stranu
di ghjunghje per sti circondi
è d'un truvà à nisunu
per fammi un chjam'è rispondi

in stu principiu d'annata
postu ch'è no ci simu
'gni puetu m'hà pregatu
tant'auguri lu primu
cù divizia in puesia
ma magaru ùn vecu à nimu

allora o cari amici
eiu vi spongu lu decoru
à chì vole venga puru
chì custì mi trovu solu
per mette appena di vita
annant'à lu nostru foru

Sentite à Caparittu
Chjama cuntrastu è pace,
Ch’ell’ùn stia in afflittu
nisunu ùn si po tace
tandu un mottu si face
mandendu qualchi scrittu.

Videndu u nostru foru
Ne aghju u core afflittu
Si sà chì u silenziu hè d'oru
Dunque anch'eiu stava zittu
Ma da stu silenziu sortu
Per risponde à Caparrittu

Resta sempre qualchì ghjornu
Per ditti "pace è salute"
Dunque ti mandu in ritornu
E mio rime pampanute
Prichendu chì à l'avenire
E toie ùn sianu mute

U dicoru ch'è tù dici
Ùn hè più quellu ch'ell'era
È sariamu filici
S'ellu ci fussi manera
Ch'è tù ci arrechi e rime
Da fanne un campu di fiera

Ma piantemu cù a rima
Chì hè un sugettu ligeru
Sì a salute hè a prima
Di pace sò missageru
Ricevi da la mio parte
U mio salutu sinceru.

a manera o circione
senza pinseri a trovu
per chì u foru ricevi
di rime un soffiu novu
'llu si possa impruvisà
quant'è in fiera di Niolu

a sai bè chì per quessa
mi ci vole bellu pocu
basta solu à esse in dui
per mette in ballu stu ghjocu
qualessa sia a stonda
qualessu sia lu locu

bisognu ùn ci hè di robba
di tavulinu o di sedia
eiu ùn sò cum'è certi
chì cherenu sta miseria
basta ch'e trovi un puetu
è la mio musa si sveglia

poi in chjam'è rispondi
ùn ti racontu una fola
s'è dumane a mio musa
per disgrazia si stà sola
u mi facciu da per mè
ch'hè lu più chì mi cunsola

Ubba cum'è tù sè sgualtru!
Faci subitu risposta
A mi faci à quattru à quattru
Eppo' cusì ben cumposta
Vecu chì l'urdinatore
Hè più lestu cà a posta

Si a Madonna a mi cuncede,
O Caparrittu s'e campu
E to rime cù e meie
S'imbulighjaranu in campu
È fin ch'e saraghju quì
Ti staraghju sempre accantu

Sì u Signore à m'accorda
Sì a Madonna a mi cuncede
Per pudetti dà a corda
Ci andaria annant'à un pede
È ci chjinaremu in tarra
S'elli ùn ci danu carreie

s'è un ghjornu in campu di fiera
carreie ùn ci n'hè micca
sappia bè chì la mio musa
quand'ella ùn vole stà zitta
invece di pusà in pianu
preferisce stà arritta

Tù farè cum'è tù voli
per fà sente e to canzone
In fiera s'è tù ci colli
Ci truvarè à Circione
Strallatu arritu o chjinatu
Canta in ogni pusizione

cantà in ogni pusizione
circiò t'aghju digià vistu
ma s'è per disgrazia trovi
un bichjeru di pastizzu
ùn poi stà chè chjinatu
ch'ùn poi più tene arrittu

Li preca "salute è pace"
À u s'amicu Circione
Eppo' subitu u face
Passà pè un briacone
Ma senti o "Gabarit"
Soca u pastizzu ùn ti piace?

U peghju hè chì Sidussincu
Ùn ci hà mancu fattu mottu
Soca u so versu hè spintu
È u so estru s'hè rottu
Pace è salute ancu à tè
O amicu ('tù scia stintu)

certe volte o Circione
omu ùn si pò stà dighjunu
ogni tantu à l'occasione
mi sciaccu un cinquant'unu
ma sempre cù muderazione
bench'e u truvessi bunu

invece tù cum'è "Obelizzu"
sè cascatu in lu paghjolu
ti beieristi pastizzu
quant'ellu ci hè acqua in Golu
bastava à sente u to stizzu
annu in fiera di Niolu

Cantate in ogni manera
E in ogni pusizione
Ed eiu vi stocu à sente
Calatu nu lu serione
Ma vi salutu quantunque
Caparrittu è Circione.

ti salutu o Sidussincu
parente è paisanu
posa puru ma t'avertu
sì t'ai u t'incrochju in manu
ùn vale a pena à stà quì
vaitine puru luntanu

À chì beie u Cinquantunu
À chì beie u Damiani
Ma in campu "à dighjunu"
Sò pochi i cristiani
Avà chì quill'altru hè ghjuntu
Vi lasciu trà paisani.

Di tene l'arnese in manu
Un crergu 'lla sia difesa
E dumandi sempre in vanu
Chì a pace ti sia resa
Un lu possu più cappià
Avà ghjè una "prottesa"...

s'ella ghjè una prottesa
ti sè sbagliatu di mudellu
è di cumandanne un'antra
amicu faristi megliu
chì ti ne ci vole una nova
per rimpiazzà lu ciarbellu

Viaghja lu mo ciarbellu
Quantu viaghja a to lingua
Ch'un hà bisognu d'aiutu
(à tutta cosa s'azzinga)
E mi ne farei un astra
S'è t'un ai a salimastra.

salimastra ????

di pussede un gran'ciarbellu
ùn appia la pratinsione
è per cumpranne unu novu
prufitta di l'occasione
feghja chì in Bastia avale
ci sò "solde" è prumuzione

Ùn sò micca affari à fassi
Di cantà cun quellu incrochju
Ci hè ancu da inchiitassi
È piglialla in catarochju
Cù e vostre scimità
Fattu ete scappà u Ciocciu

ùn ai chè da chjamallu
s'è tù voli ch'ellu volti
ma u ciocciu hè un acellu
chì canta solu e notti
or ùn sò mancu cinque ore
cumu voli ch'ellu sorti

Ma ch'ellu s'appolli puru
Nantu à a rama più alta
È da quassù sò sicuru
Chì a so musa nun falta
Bench'ell'appia un difittacciu:
Ne face una eppo' scappa.

Circione a écrit:

Ma ch'ellu s'appolli puru
Nantu à a rama più alta
È da quassù sò sicuru
Chì a so musa nun falta
Bench'ell'appia un difittacciu:
Ne face una eppo' scappa.

Aghju intesu un fischjacciu
è vociate apressu à mè,
per u cumu d’u perche
mandu prestu un dispacciu
senza circà à sapè
s’ell’hè chjama o lacciu.

U Ciocciu hè di ritornu
Ùn mi pare mancu vera
Duie strufate u ghjornu
In vitezza di crucera
A prima vene a mane
Quill'altra vene a sera