Riintrata di i pueti!

Hè ora  chì i pueti
Fianu la riintrata
Ci simu fatti discreti
A musa  era scunnittata
Soca tuccarà à mè
À fà a prima strufata

Hè ghjusta chì d'astatina
Ogni puetu stimetti
Ch'omu dormi a matina
Ch'omu scaldi i so letti
Si piglia gativi mendi
Per ùn dì micca  "difetti"

Ma l'estate si finisce
Perchè  tuttu hà una  fine
A musa torna  fiurisce
Ritrova le so cunfine
Quelle di l'Isula Foru
Arvinta d'onde turchine

Ancu  la Santa hè finita 
Ghjotu  hè u  campu di fiera
A  nostra  festa, hè  capita,
Ùn  hè  più quella  ch'ella  era
Ma  di  facci una cantata
Si  trova sempre manera

Sinamente à ghjornu  chjaru
E paghjelle si sò intese
Perchè u tinimu  caru 
Casamacciuli paese
Incù  u so campanile
Cù tante candele accese

Per mantene a tradizione
Di Pampasgiolu è Minnellu
Ci era Orsucci di Tallone
Forse l'ultimu puntellu
Eppo' ci era  un  zitillone
Giannecchini di  Quercitellu

Ci eranu i mio paisani
Simeoni è Acquaviva
Bench'elli appiinu i so anni
Ci hè  sempre  a ligiadria
A puesia luzzinca
Cun elli hè sempre  viva

Santini di Merusaglia
Di u Mucale Villanova
Cuncurrianu pè a medaglia 
Di quellu  chì a li prova
À  cumpone una  strufata
Ma a cerca è ùn la  trova  

Aspittava ch'ellu ghjunga
Quellu  di Suddacarò
Parlu di Bobbu a spunga
Ma  s'ellu hè ghjuntu ùn  la  sò
Per  isse  baracche ùn  s'hè  vistu
Soca  era  à L'auto-tampò  

Benchì  di  rima pruvisti
Caparrittu è  Sidussincu
Tramindui l'aghju visti
Per issu campu  niulincu
Ma per falli impruvisà... 
Què mancu per falà Pincu!  

Sidussincu ùn hà cantatu
Ma per quessa ùn li ne vogliu
Soca era cuntrariatu
Videndu u purtafogliu
À trenta aurò u litru
Quellu  s'hà cumpratu l'oliu 

Cantatu eiu ùn aghju
Ch'ùn ci fù nimu à chjamammi
Ma mi sò datu à l'assaghju
Di parechji vini infami
È cusì chì buscu m'aghju
I mio trè o quattru grammi...

Era in fiera di Niolu?  
Cumu hè chì ùn t'aghju vistu?  
Aghju chjamatu : "Tittolu!
Tittolu! sangu lu Cristu!
Dunque vedi t'aghju chjamatu
Ma ùn ti ne sè arvistu  

Incù a to vuciarella
Ai mughjatu o Circiò
Forse cum'è una zitella
Cù l'ormone in bisbò
Ma eiu ùn t'aghju intesu
È mi stedu à paccarò

Soca faci cunfusione
Cù Ghjallochju - u to amante -
Sappia chì sò un puitone
Cù un versu affascinante
Di Casata sò Onfion
Di picculu nome Dante

Avà sì ch'aghju capitu
Ciò chì era a cagione
Di u to passu sticchitu
Mentre a prucissione
Ne viaghjava traditu
Cù Ghjallochju o Dante Onfion

A sapemu o Tittolu
Chì ti piacenu i flonflons
A la Santa di Niolu
Daretu à l'auto-tampons
T'aghju vistu incù Ghjallochju
Ma forse era Dante Onfion

Inventi o Circiunellu
O soca ùn ci vedi bè
Ùn era micca cun ellu
Chì tandu era ind'è tè
Vai puru u mio zitellu
Fatti un giru ind'è Luxey

Eccu l'ultime nutizie
À l'istante l'aghju intese
È ùn sò micca scimizie
A m'anu detta in paese
'Ci chì Tittolu si tene
Cù un ghjudice casinchese

Tù, maneghji a bucia
I puttachji à divizia
Mai mai ch'ella sia
A dicu senza malizia
Eiu ùn mi permattaria
Di ficcala à a ghjustizia

Di manighjà a bugia
Eiu ùn mi parmettu micca
A m'hà detta qualchissia
Un'amica à mè - hè flicca -
E s'aghju capitu bè
Hè a ghjustizia chì a ti ficca

Eiu aghju intesu cusì :
Hè Circione, s'ella casca,
Chì di notte, à sente dì,
Mette a cappa è s'ammasca
È ritrova u so scerì
Bancalaru in Vinzulasca

Sè tù ch'ellu tene caru
Credi puru chì mi dispiace
U tippu hè bancalaru
Eppo' ghjudice di pace
È ùn possu scrive quì
Tuttu ciò ch'ellu ti face

Dì ciò ch'ellu face à tè
Eiu possu eppo a scrivu
U bancalaru à mè
Mai ùn mi tuccarà vivu
Ma cunnoscu u so piacè
Di carrizzassi un alivu

Sò alivu  hè virità
È per  quessa  nun mi lagnu
Ma ùn mi lasciu  tuccà
Da u to  caru  cumpagnu
Chì anch'ellu cum'è tè
Travaglia cù u castagnu

S'e capiscu tuttu bè
U bancalaru si stà
Per buscà u so gudè
Solu solu in virità
Tandu ùn vecu cà què
A seca deve aduprà

Adopru seca è taglioli
Hè vera mi cunfessu.
Site sparversi o figlioli
U dubbitu ùn hè permessu.
Chì nantu à e mo tavule
Vi carrizzate lu sessu.

S'è tù fussi una zitella
T'avaria datu una rosa
À a t'amica "Tittella"
Un mazzulu di mimosa
Per ch'è vo piantite a rima
È rimettevi à a prosa:flower: 

Piglia puru a to rosa
E u to amicu Tittolu
Un gambone di Mimosa
E sciaccatili à l'usciolu
Ne ritornu à a mo prosa
Tranquillu è solu solu.

O Ghjudice  vi ringraziu
À ringraziavvi o Tittolu
Cun voi u nostru spaziu
Dui pueti hà ritrovu
Ma mancanu à l'appellu
L'altri dui di Niolu

Sidussincu o Sidussì
Hè finita a calmana
Aiò veni appena quì
È sorti  di a to tana
Scrivi in duminicata
S'è t'ùn poi a simana

Caparrittu o  Caparì
Avà chì  sè cappessianu
S'è t'ai qualcosa à dì
Piglia a tastera in manu
Guarda chì  vengu à  circatti
Calvi  ùn  hè  tantu luntanu

ùn vale d'andà in Calvi
è di fà tamanta mossa
u marti dopu miziornu
franca la strada à a còrsa
per vene à truvà à mè
in cullegiu di l'Isula Rossa

U marti dopu miziornu
Eiu sò digià luntanu
Ma s'è tu faci ritornu
In cullegiu lisulanu
U ghjovi inde a ghjurnata
Vengu à tuccatti la manu

i nostri li spartitempi
vecu ch'elli ùn sò cumuni
in l'Isula ùn travagliu
ch'è u marti è u luni
u marcuri scappu prestu
almenu ch'omu m'affuni

Da Calvi à L'Isula Rossa
Ti ci affacchi in quattru salti
Ma cumu c'emu da vede
S'è tu finisci u marti?
Chì s'aghju capitu bè
Da ch'è tù ghjugni riparti?

Eiu nun t'aghju rispostu
Rispettu e manere antiche
I pueti avianu postu
Criscianu tante spighe
Avale hè tuttu zappatu
Da e vostre nove righe.

(per u primu suggettu...)