Riintrata di i pueti!

Chì m'aghju da caccià à fughje
Mancu ch'ellu falga Pincu
A sai bè chì l'Erbaghju
Hè di ceppu pumuntincu
Ma a scappata l'hà fatta
Quellu amicu niulincu (O Sidù)

Di e tane hè a stagione
Eppo ancu di e grotte
Un mi bastanu i ghjorni
Chì travagliu ancu di notte
Quì dò un colpu à u chjerchju
E un antru à a botte.

Hè vultatu l'assassinu
Scrianzatu è impulitu
Sidussincu hè un maldestinu
Un sbirru è ancu un banditu
Chì hè vinutu à fanne una
Eppo' dopu hè fughjitu

Per fà fughje u nostru amicu
Cum'è tè ne ci vole dece
Senti bè ciò ch'e ti dicu
Ellu hè torna quì invece
S'ellu parte a ci hà detta
Hè chì hà e copie à currege

Fideghja chì un pullone
À tutti ùn dà i stessi frutti
E copie di i prufissori
Ne cunnoscu i prudutti
Ma sta sera i niulinchi
Eiu i mi manghju tutti

E copie magnale puru
S'elle  sò què e to voglie
Tantu ne era sicuru
Ch'è  tù fussi un magnafoglie
Ma i  frutti  ch'e  ti demu
Soca  ùn li  sai coglie

Soca i vostri i pulloni
Sò maestuosi è belli
Sò cullatu in l'Acquale
Par u più sò prunalbelli
È quill'altri in Sidossi
Sò tamanti à i me meli

A copia ch'è tù mi rendi
Parla di l'alburatura
Dici chì i nostri castagni
Ùn sarianu à l'altura
Ma eiu insegnu u corsu
È micca l'agricultura

Stasera ùn hè l'uccasione
Di  currege u to stracciu
Aghju l'altre currizzione
È u mio travagliu u facciu
Perchè ùn  travagliu micca
À  a merria  d'Aiacciu...

A to musa hà a ragione
Ùn hè più amparaghjola
Par tè hè megliu à tene
U feltru cà a ruspaghjola
È di lascià a campagna
Par stassine in iscola

Eccu avà ai dettu tuttu
Eiu sò un omu mudernu
U castagnu è u so fruttu
Ch'elli vochinu à caternu
Basta ch'appii u mio feltru
È dinù u mio quaternu

Ch'ellu crepi u pullone
Quandu tuttu u ventu spazza
Si stà megliu (ai ragione)
À u caldu inde a classa
Guarda chì à a merria
Ti pudemu fà una piazza

Sappia ch'aghju studiatu
È nun sò qualvogliasia
Avaria straziatu
È messu tantu energia
Per finisce in Aiacciu
Impiecatu di merria?

Soca d'avè u capes
Sarè tù un capizzone
U sirviziu LCC
Cunnoscu bè u patrone
Veni puru ind'è noi
Chì faremu e canzone

Aiò chì aghju da finisce
Di currege i mio cuntrolli
Soca mi voli scimisce
Inquant'à mè mi ne voli
Ripiglaremu dumane
Sì per sti lochi ti trovi

Aiò femula finita
Ch'emu persu moglia è botte
Cù sidussincu vo' fate
Un paghju di paghjole rotte
Ùn travagliate di ghjornu
È fate nice di notte!!

   

Avia dettu nove ore
Prestu sò nove ore è cinque
O tamantu crepacore!
Ùn ci hè rime sidussinche
Nemmenu marignanese
È più pocu petralbinche  

Avia dettu nove ore
Sò prestu nove ore è dece
In Marignana di core
A musa vogliu direge
Sidussincu ùn ci hè ancu
Soca hà e copie à currege

Pianu pianu o prufissò
Guarda chì sò incù tecu
Eppo' civa par l'assenti
D'ùn ispartele cù mecu
Sì tù ùn m'ai micca vistu
O sè guerciu o sè cecu

Nove ore avia dettu
Avà sò nove ore è vinti
Faci u primu tirzettu
Cù i to versi distinti
Pensa à tutti i spettatori
Chì t'aspettanu i tinti

Sappia chì par esse à l'ora
Aghju fattu un bellu sforzu
Ma sta sera a ti prumettu
Cù Leandru u tempu hè corsu
Ma aghju fattu par u megliu
Par quelli di u Foru C - - - -

Ghjungu sempre à ora detta
Chì u mio rilogiu guardu
A ti dicu chjara è netta
O Erbaghju sè bugiardu
Chèi dici di ghjugne à l'ora
Quand'è tù ghjugni in ritardu

Subitu ùn aghju rispostu
Ch'avia u telefonu in manu
Ma sappia chì sò dispostu
À fà in furia è micca pianu
avà ci n'hè ghjuntu un antru
Bona sera o Isulanu

Sì l'affare ùn ti piace
Vai à lampatti in mare
Quandu m'affaccu ugni tantu
È par passà e stonde care
Quì patrone ùn ne aghju
Vengu quand'ella mi pare

Prestu ti n'ai da arvede
Lighjendu le mio canzone
Ancu sì ùn la voli crede
L'ai ancu tù u patrone
Batte annant'à isula foru
Di fintunome hè "Circione"