Riintrata di i pueti!

Tandu sì i cacciadori
Saranu tutti felici
Ùn faranu più sudori
S'e facciu ciò ch'è tù dici
Hè un piccatu ùn possu vene:
Bastia ghjoca in Parigi

Avà basta a to cumedia
Arresta a to fisichetta
Veni à scopre à Arbaghju
Cù l'arcusgiu o a scuppetta
Chì pà sente u to macciacciu
Emu a radio in casetta

Per stà à sente à Pruneta
Un'ora è mezu à a radiu
Ci vole à esse un veru esteta
O ci vole à chjamassi Erbaghju
Ma eiu i ghjucadori
Vocu à vedeli à u stadiu

Più và è più mi dispiace
Circiò a to puisia
À un amicu ùn si face
Di cuntalli una bugia
Parchè a sò chì u macciu
Ùn si ghjoca in Bastia

Hè vera ghjocanu fora
Quessa anch'eiu a rimarcu
Dumaitina à bon'ora
In lu prima aviò imbarcu
Ver di quattr'ore di sera
Saraghju anch'eiu à u Parcu  

Megliu avaristi fattu
Di stà à sente à Erbaghju
È d'ùn spende i to danari
Par andà inde un stadiu
Chì à a posta di u lutarnu
Sta mane ne hè passatu un paghju

Ancu tù l'avarè vista
Chì i nostri ghjucadori
Pigliatu anu una rivista  
Vistuti da cacciadori
Megliu avarianu fattu
À tene i so culori

 

supporters cum'è Circione
di più scemu ùn si n'affuna
'ce ch'ùn si sente cà ellu
scanellassi in la tribuna
ma à Bastia m'arvecu
ch'ellu ùn li porta furtuna

Ai puru a ragione
S'assumiglia à un mazzeru
Chì quand'ellu hè in tribuna
Sempre bastia hè à zeru
È sarà capace à dì
Ch'ellu hè compru l'omu in neru

Hè vera chì ùn mi stò zittu
Mi sò scannillatu in veru
À sente à Caparrittu
Sò eiu u ghjattu neru
Ma s'ellu ci era statu ellu
Aviamu persu ottu à zeru

Erbaghju ciò ch'è tù dici
Mi face ghjugne a stizza
Sò vultatu da Parigi
Ghjancu cum'è una panizza
Ma sabatu in Furiani
Emu da vince contr'à Nizza
  

per piacè sabbatu statti
in le to loche aregninche
chì s'è tù veni in furiani
hè certu ch'ùn si pò vince
Bastia ella farà ciabba
Nizza ne marcarà cinque

Dunque in casa mi staraghju
Cusì sdiccia ùn li ne portu
U macciu u bardaraghju
Annantu à BeinSportu
Mentre chì Erbaghju in casetta
L'ascultarà à u postu

Pichjà vogliu in le mio mani
tale a maestra di scola
chì i pueti isulani
venghinu in giru à a tola  
d'u cuntrastu invece di
stà cum'è aste d'incolla

Ma guarda chì i pueti
Ùn simu micca sculari
Senza palisà sicreti
Ognunu hà i s'affari
È certi sò sempre à caccia
Vistuti da militari

Mi rispondi cun malizia
Per difende u battaglione
Hè à caccia a to milizia
Fucile à u cinturone
Ma hè ghjornu d'armistizia
È l'arme ci vole à depone !

Ma guarda chì ind'è l'Erbaghju
Truvarè pocu ghjudiziu
U nostru amicu hè carnaghju
Indu a pelle hà u viziu
Scumettu ch'ellu era à caccia
U ghjornu di l'armistiziu

À u tabaccu stamane
U giurnale cumpreraghju
Forse averà da parlà ne
D'a ghjurnata di l'Erbaghju
È s'ellu era à caccia o nò
L'ondici ti diceraghju

Cù trè ghjacari appressu
È a carabina in manu
Eru à "a petra pinzuta"
Fieru cum'è un capitanu
Chì fideghja i so suldati
Chì tutti à u fronte vanu

Intantu avemu a risposta
Data da l'interessatu
Eri si truvava in posta
Ch'à caccia era andatu
Averà tombu u cignale ?
Di què ùn ci n'hà parlatu

L'Erbaghju ùn vede u male
Ùn pensa cà à una cosa
A caccia à u cignale
Hè a so siconda sposa
È a dumenica corre
Chì in simana si riposa  

Hè affaccatu u vaghjime
È mette à scrive Circione
À sei ore di matina
Digià prontu u leone
Po, canta è volta à chjinassi
Sò smarite l'illusione

7:20?
L'ai fattu fà in Rumenia stu foru o chè?

T'anu cambiatu di "fusu", 
Ùn la  so micca    o allora
Soca facianu u musu
Chì sè  statu assai fora? 
Ma ùn  appia pur pinseri
Chì  t'aghju da mette à l'ora.

Mi voli mette à l'ora
Cù u to versu altieru
È voli cambià di fusu
Troppu imbutu, troppu fieru
Ma di fà u rilugiaiu
Hè difficiule mistieru