Riintrata di i pueti!

S'è tù sì omu di pace
Ti lasciu cinghje carchera
È ùn starè tantu à ghjace
Chì prupusizione ùn era
Sappia chì per quest'impiegu
Ùn sò pari berciu è cecu

Quessa hè vera o Isulanu
Cecu è berciu ùn sò pari
Arma puru a to manu
Sì a guerra mi dichjari
U prufessore un teme
A rima di i sculari

I sculari anu a paura
Hè a pura virità
Ci mettanu a primura
Ma l'affare ùn pò durà
Guarda puru à Sidussincu
Ghjugne, leghje è si ne và

 

U prufessore ùn teme
A rima di u sculare
Ma o maè caschi male
Feghja bè u cartulare
Aghju da barattà cartina
Contr'un pezzu di calcina

Di scrive cù a calcina
Sò faccende di un'antra età
U portapiume è a mina
I poi puru ghjittà
Per scrive à u tavulone
Oghje ci hè u Velleda  

Teni puru u Velleda
Chì à mè po ùn mi sende
Quell'ogettu hè prestu viotu
Davanti à e mo faccende
Campu sempre à l'anticogna
È mancu ùn aghju vergogna

Sì  i to  versi  sò  vivi
È  s'è tù  faci canzone
È di calcinella  e scrivi
Annant'à u  tavulone
Tandu  ci vole  ch'è tù  conti
Chì e  ti  sguassarà  Circione

E mi sguasserà Circione
E mio opere più belle
Soc'ùn hà ancu capitu
Chì u so prufume à elle
Benchì di brossa* sguassatu
In mente à mè hè stampatu

* 

U to pezzu di calcina
Oghje ùn hè più à a moda
Duve tù metti a mina
Passu cù a sguassaghjola
Lascia core a cartina
Chì ùn simu micca à a scola

Per u cantu impruvisatu
Di scrive ùn pò ghjuvà
È mentre chè tù scumbatti
Cun i muri da sguassà
Ùn ai cacciatu nunda
Pare ch'ùn sappii cantà

O ghjente simu sicuri
Quessa allora po mi tomba
Face i taghi annant'à i muri
Isulanu incù a bomba
È face nice d'ùn sente
A mio voce chì ribomba

Mentre ch'o facciu i taghi
Tù sì digià in vittura
Chì th'à chjamatu u merre
Da sguassà prestu a scrittura
"Corsica is not France"
Dece litri di pittura

A Corsica ùn hè a Francia
Ma inglese ùn mi pare mancu
Ùn sò micca una bilancia
Dunque ùn ti palesu ancu
Ma s'è tù taghi in inglese
Sguassu incù u spirdu biancu*














*White spirit  

 

Sappia chì per esse "in"
Ci vole à scrive in inglese
Ma s'è tù mi sguassi tuttu
Tandu steraghju curtese
È cambieraghju di lingua
Tagheraghju in lucchese

Ùn la vecu  cà  avà
Erbaghju a to risposta
Di fatti  torna aspittà
Credi puru chì mi  costa
È  mancu  aghju a scusa
Di una  greva di a posta

Da  u principiu  à a fine
Ciò ch'è  t'ai dettu  hè vera
L'estru  di e  nostre  rime
S'hè struttu cum'è a cera
Quand'unu chjama a mane
Li si  risponde a sera

Sò  anch'eiu cum'è  tè
Nustalgicu di isse stonde
Quandu  chì  da  tè  à mè
Cuntavamu e siconde
Chì  quand'è tù mi  chjamava
Eiu  ùn  tricava  à  risponde

Approvu appienu  u  sensu
Di e  to  belle canzone
Più  ti leghju  è  più a pensu
Sè tù  chì  ai a ragione
Dunque  torna  cum'è prima  
Mi  vogliu  tuttu dispone

S'è  tù ùn rispondi  stasera
Rispundarè dumatina
Chì  ciò ch'è  tù  dici  hè  vera
O  di  u veru  s'avvicina
Ma quantunque  o Erbaghju
Ùn simu micca à l'usina

Dumane ùn sarà cum'è oghje
È oghje ùn hè più cum'è eri
Certi anu e pastoghje
D'altri sò fieri è altieri
Ma in l'usina di tantu
Signaria vulinteri

Da risolve stu prublema
Ci vole à sunà u cornu
Pudemu prupone un tema
Pricisendu ora è ghjornu
È tandu ci cuntaremu
In giru à u stessu fornu...

In ballu sò prontu à entre
Principiaremu eiu è tù
Barda chì eiu ci sò sempre
È tù ùn veni sguasi più  
Chì per cantà incù l'Erbaghju
Ci vole à piglià rendez-vous  

Ma posta ch'ella hè cusì
Faremu cum'è tù voli
È a poi puru dì
À l'altri s'è tù i trovi
Di fissà l'appuntamentu
Dumane chì simu ghjovi

Sidussincu dimmi appena
Senti l'idea ch'e aghju:
Ci truvemu dopu cena
Dumane incù l'Erbaghju?
Dilla puru à Caparrittu
Osinnò u chjamaraghju

Circione a écrit:

In  ballu sò prontu  à entre
Principiaremu eiu  è  tù
Barda chì eiu  ci  sò sempre
È tù  ùn  veni  sguasi più  
Chì per cantà  incù l'Erbaghju
Ci vole  à piglià rendez-vous  

Avà vecu chì Circione
Bataleghja cù piacè
'Ci chì par fà e canzone
Oramai u solu hè
Chì a chjama è a risposta
E si face da par sè

Diciarete "Sidussincu
Si stà in tana cum'è l'orsi
Per fà u chjam'è rispondi
Ci vuleria 'llu si sforzi"
Ma s'eo un la possu fà
Hè chì pripargu i mio corsi.

Ùn a voli accittà
Chì e to rime ùn sò quelle
Allora veni à cantà
Sempre e stesse riturnelle
Fendu crede chì tù strazii
Da e stelle à e stelle

Ùn  hè  ancu l'astagione
Per  stassi  inde  so tane
Sunaranu  e ciccone
Cun tutte l'altre campane
Chì  tutt'ognunu s'affacchi
Ver di nove ore dumane

Postu chì l'Erbaghju ci hè
– ùn mi pare mancu vera   –
Ci  farà forse  u piacè
D'attaccà  dinù  stasera
Almenu ch'ellu si strughji
Dinù ellu cum'è  cera

Ci ai fattu e canzone
Dicendu a to primura
Dicendu ancu à Circione
Di risponde appena in furia
L'attesa di a to risposta
Erbaghju quant'ella dura