chjama à i pueti isulani

Chì u fogliu nùn hè biancu
O Circiò ci sò le prove
Arrisera ghjera stancu
Ma stasera e rime nove
E ti renderaghju prestu
E mittarei e note.

Mi parenu belle fruste
Sidussincu e to rime
È le mio note sò ghjuste
Da l'ultime à e prime
Ùn possu mette cà zeru
À u to scrivacciulime

scusami o sidussincu
di sparghje lu mo velenu
ma s'o era a la to piazza
mi daria di rimenu
a to copia ùn vale zeru
chì vale ancu di menu

S'elle sò ghjuste e to note
Di fatti eo mi ne passu
Quand'è tù mi ghjudicheghji
Sì più duru chè u sassu
Ma quand'è tù cantichjeghji
C'hè u ghjustu è c'hè u falzu...

Avale ghjè di ritornu
Nostru amicu Caparrittu
M'hà lampatu la so chjama
E dipoi si stava zittu
Pensu chì l'hà fatta apposta
Pè tagliammi l'apitittu !

mancu ùn ti faria male
s'è l'appetittu ti cacciu
manghji tutta la ghjurnata
è per quessa mi ne facciu
oramai sè ingrassatu
chì pari tuttu un buttacciu

Custì po o Caparittu
Ti trovu propiu aggrissivu
In Digna hè un delittu
Di nutà in nigativu
Quallà notanu u fogliu
Ancu sì d'inchjostru hè privu

à sidussincu :

A mio voce ùn ti cunvene?
Aiè hè una macagna?
Aghju u cantu in le vene
U versu di a muntagna...
Voli fà à Pavarotti
Ma sè Roberto Lasagna

A to lingua hè arrutata
Cum'è quelle di e streie
S'o passu u tempu à manghjà
Tù passi lu toiu à beie
A a fine sò sicuru
Ai da finisce tamburu.

(pè Caparrittu)

(à Circione)

S'è tù stai à sente à mène
A ti dicieraghju in faccia
S'è tù ti dava a pena
Mancu ùn ai una vuciaccia
Ma u cantu in le to vene
Chì l'intrena hè a vinaccia !

Chì u vinu face cantà
Quessa ùn hè micca un sicretu
M'aiuta ancu à impruvisà
Qaundu facciu lu puetu
Tù chì bei l'Orangina
Mi sarè sempre darretu

Amicu in puesia
A chì fala è à chì colla
Impararesti a curtesia
'tu biissi l'acqua sola
Chì face l'idee chjare
Di più chè u Coca-Cola.

In tuttu ci hè una misura
Ci vole à beie pianu pianu
Eiu per esempiu à st'ora
Aghju un bichjeru in manu
Hè un "Diplomatico"
Rumbu venezuelianu

Un ultima pè stasera
Chì u lettu ghjè vicinu
Dumane aghju da piglià
Di Marseglia lu caminu
Eppo' stasera sò stancu
Di cumpete cù u vinu !

à sidussincu

allora a t'aghju da dì
per rinfriscatti e ideie
sappia bè chì per campà
hè nicissariu di beie
senza acqua o Sidussincu
eiu ti vurria vede

Scusami o Caparrittu
Ma ùn t'aghju salutatu
Sè ghjuntu è sò statu zittu
Sta sera hè pocu lu fiatu
È mancu mi n'era arvistu
Ch'è tù era à lu mio latu

A rusta di a puesia
Cusì prestu s'hè ghjalata
Ma fate per curtesia
Ripiglià a impruvisata
Almenu chì ind'è l'alcolu
A Musa si sia annigata

L'avaria accatizzatu
Quellu focu chì si spegne
Ma eiu ùn aghju più fiatu
È caparrittu ùn hà legne
Dunque mi stò solu quì
Cù i mio ochji per piegne

Piattu in la so citadella
Ùn teme micca l'assaltu
È sticchitu cum'è un palu
Quellu viaghja capaltu
Mirdaria u suppliziu
Di e piume è di l'asfaltu

Chè tù ùn ai più fiatu
À quessa ùn possu crede
Di puesia impastatu
Di passione eppò di fede
Aiò datti di rimenu
Chì u focu ci vole à accende

Sò cum'è u piscadore
Azzingu u lumbrice à l'amu
Ma quellu impruvisatore
Ùn risponde quandu chjamu
Mirdaria u suppliziu
Di e piume è u catramu

Dicenu ch'è t'ai a fede
Què mi pare un dettu stranu
Ci vole veramente à vede
S'è tù sì un bon cristianu
Perchè più belle prighere
In infernu nùn ne fanu...

Piglialati pianu pianu
È ùn fà micca tantu fume
Essendu un bon cristianu
Ti mettu à u prufume:
L'ai da cunnosce ancu tù
U catramu cù le piume

Ma chì mi parli di piume
Soca ai qualchì ghjallina
E l'ai stirpate tutte
Cù la to arte vulpina
Ti lasciu pè u ripastu
Ma pietà pè u pullastru !