chjama à i pueti isulani

à circione

eiu ùn m'inchietu per ellu
chì di millioni ùn ne manca
i soldi ùn li spende micca
l'accatamanseghja in banca
ùn hà mancu curagiu à mette
a so turnata à a Santa

La pizza ch'ai manghjatu
Lla ti stessi à meza gola
Ghjè vera l'aghju pacata
Ma per una volta sola
Ch'a to lingua nun ringrazia
Una volta ch'ella hè sazia...

D'ùn pacà a so turnata
Quessa ùn hè usanza corsa
A muneta accatastata
A purtarà indu a fossa
S'ellu và in campu di fiera
Cù un paghju di zini in borsa

di vene à manghjà cù tè
o Sidussì m'ai chersu
cù speranza ch'e m'intorzi
ingullendu di traversu
è dopu parli di mè
ditemi chì omu hè quessu !!!

Chì omu hè quessu, o amicu
Avale a t'aghju da dì
Hà invitatu u so parente
E dopu mancu "merci"
Avà si ne và un oretta
A curegge e so copì !

(bellu cuntrastu, ma aghju u travagliu, ùn hè micca una burla !!!)

avale vocu à chjinammi
chì dumatina mi levu
o Sidussì ricunnoscu
chì custì u tortu hè meu
sì Diu vole un'antra volta
a pizza a ti pacu eiu

Bonasera o Sidussincu
Degna risponde à Circione:
A ci hà detta Caparrittu
Sè u veru rancicone
I libri cù a vittura
Compri tuttu d'uccasione...

Quessu po' u bonasera
Mi ne saria passatu
Mi chjappi à a chjinera
Cù u ciarbellu fatigatu
Compru anc'ellu d'occasione
Crergu chì l'aghju frazatu...

Allora lascemu corre
È ùn mi risponde mancu
Bonanotte o prufessore
Vai puru sè tù sè stancu
Eiu ùn possu micca dorme
Passu le nuttate in biancu

Passi le nuttate in biancu
Eiu le jurnate grisge
Ma di stuzzicammi tantu
Quessa a manera sdice
Cerca di piglià u sonnu
Eiu sò già à l'arice.

Sidussincu Sidussincu
S'è tù passi per isse sponde
À l'amicu niulincu
Stasera degna risponde
Inquanti à mè in cuntinente
Passi le gattive stonde?

O Circiò lu mio Circione
Ti sentu è ti capiscu
Un passu gattive stonde
Trà l'isulani mi mischju
Ma ùn sò cum'è u cane
Chì risponde à ogni fischju.

Di Sidossi e campane
Sonanu triste è languente
È tù solu cum'è un cane
Ti ne stai in cuntinente
Ch'è tu ti mischii a crelgu
Ma micca cù a to ghjente...

Chì facciu a vita canina
A ti dicu franca è netta
S'o pudia chità Digna
A faria ma in fretta
A campa chì nu stu foru
U paisanu m'aspetta.



(bon, aghju straziatu pè risponde... mi scusu torna ma aghju u travagliu, per quindeci ghjorni ùn puderaghju tantu fà chjam'è rispondi...)

Di risponde à la mio chjama
O amicu ùn si ricusa
Soca ùn ai tanta brama
Eccula a vera scusa
Micca quella di u travagliu
Chì t'impedisce la musa

A pratica d'u mistieru
In trà di noi ghjè spara
Chì tù canti trallalleru
E sì sempre cù a ghitarra
Eiu cù a penna in manu
Sò nu l'angoscia è l'affannu...

sidussincu in cuntinente
ùn ne manghja più tranquillu
francamente mi dispiace
ma t'aghju da dà stu cunsigliu
s'è tù faci a depressione
pigliati un "lezomillu"

Chì nùn manghju più tranquillu
Ne sarei la ragione
Appruntava lu stuvigliu
Per sciaccami un buccone
E mi lampi a to chjama
Chì mi custringhje à risponde...

Bardate chì hè torna quì
Cù a cumedia ch'ellu fece
Soca avà face cusì:
Hà centu copie à currege
È da arrisera in quà
N'hà digià currettu dece

Avà ghjunghje u cantadore
Pè stuzzicà u s'amicu
Ellu di u prufessore
Un cunnosce u casticu
Crede chì a currezzione
Hè quant'è manghjassi un ficu...

Ai a pratinsione
D'amparammi u mo mistieru
S'e facciu e currizzione
Caru amicu ùn ci hè pinseru
Quistione di puesia
Avarè un bellu zeru

Ti rispondu eppo sò seriu
Balaninu finu è untu
Sai chì l'usu di u zeru
Oramai hè defuntu
Postu ch'aghju resu a copia
Si obligatu à mette un puntu !

Ch'è vo a fiate in Digna
Ùn mi stunarebbe mancu
Ma quì da Aregnu à Pigna
Sta lege ùn esiste ancu
Ùn si nota micca un fogliu
Soprattutttu s'ellu hè biancu