CHJAMA È RISPONDI IN LINEA 13/02/2014

Bonasera o Ciucciudonu
È à prestu sì Diu vole
S'ellu ti piglia u sonnu
Tandu allora ci vole à move
Cerca è volta ognitantu
À fà torna e to prove

quella d'u to fiume à sborri
contala à un simplicione
chì mi ci vole una mez'ora
per riempieci un stagnone
a to surgente s'hè secca
ch'ùn ai più inspirazione

I nostri fiumi sò grossi
Da Monte Cintu à L'Acquale
Ma hè vera chì in Sidossi
'Ci chì l acqua corre male
Eppo' fiume ùn ci n'hè più
Chì v'anu messu un matrale.

Sidussincu a to  surgente
Hè  vera ch'ella s'attagna
Soca hè  torba  a to mente
Soca batti a campagna
Di ùn  senteti più  rispponde
Caparrittu avà  si lagna

ci avemu à Barcalellu
chì ci fala da u Poghju
ma à divvila franca è chjara
ùn ci hè tantu scurritoghju
e sole acque ch'è n'avemu
sò a Zilia è a San Ghjorghju

a so surgente s'attagna
per ùn dì ch'ella s'arrena
si pate sempre a sete
à cullaziò è à cena
è s'ellu ùn c'hè acqua in l'ortu
pomi ùn si ne sumena

Sidussincu a so musa
Stasera l'hà messa à mogliu
Avà hè tutta cunfusa
Spugliata annant'à u scogliu
San Ghjorghju è Zilia ùn ne vole
Ellu ùn beie cà oliu   

Postu chì sò troppu bravu
Un vi faraghju un cuncettu
U fiume sà lascià corre
Ancu lu gattivu dettu
Dopu avè fattu a so opara
Piglia è si ne entre in lettu.

per lu ben'ch'eo li vogliu
a dicu ch'ellu a sappia
à rombu di stà nù l'oliu
s'assumiglia à una frappa
faria megliu à vene in l'ortu
è à manighjà à zappa

Emu purtatu i pinseri
Eramu inchieti  chì  zittu!
Vulia  chjamà i pumpieri
Dumanda à Caparrittu!
È tù sè in traccia di dorme
Annantu à a to tastera  

Pulvaraghja a écrit:

Che vo sgiate abbagliati                                                          
Ma chi sarà sta primura                                                          
Vi vegu qui passiunati                                                              
E mi pigliu di paura                                                                  
D'un vede le nostre rime                                                      
Tombe da li campiunati

S'elli falanu à fà l'ortu
Sidussinchi in Furiani
Conta puru chì u sportu
Hà da esse indu l'affanni
È anu da esse scuntenti
In tribuna Petrignani.  


(ùn la vecu cà avà a toia o Pulvaraghja)

Caparrittu Caparrittu
Guarda cum'è tù mi tratti
Aghju u mo core afflittu
Ma i fatti sò i fatti
Arrisera sè scappatu
Senza mancu licinziatti

eranu ondeci ore è mezu
è mi pigliava u sonnu
ch'e durmia in u mio lettu
di dilla ùn ci era bisognu
perchè eu dormu la notte
per arrizzammi u ghjornu

Aghju aspittatu una stonda
Era solu è à l'abbandonu
Mi pigli per una bionda?
O mi pigli per un connu?  
Ma s' è tù mi faci quessa
U t'aghju da caccià u sonnu