L'insetti (puesie)

L’INSETTI

Vola a mosca
Zinga a vespa
È ancu l’apa
S’ella hè stuzzicata
Ma u zinghittone
L’hà u calafrone

A calicaloce
Ch’hè pocu feroce
Nantu à u fiore
Respira l’odore
S’alza è si cala
Sbattulendu l’ala

È a filangrocca
Fendu gira è volta
Cum’è una fata
À ala spalmata
Snella giuvanotta
Legera eriotta

A volavulella
A porta nuvella
Rossa pichjulata
Si n’hè vulata
Da a manuccia
D’una zitelluccia.