Lamentu di a Cuchja

Lamentu di a Cuchja



La mio cuchja tantu amata
Piengu a to crudele morte
Si pertuta in sta nuttata
Senza abbaghju assai forte
Avà ti ne colli in celu
Ti mandu qualchi basgiulellu

Era meziornu passatu
E tù, morte impiccata
Eiu l’aghju ricusatu
Ma la vita hè cusì ingrata
O la mio fida cumpagna
Di te, famiglia si lagna

Vogliu chì di lu mio cantu
Rinasce lu to amore
Per la caccia, altri è tantu
Batte sempre lu to core
O cara la to persona
Meritava la curona

Eri sempre cusì festosa
Cù la ghjente è la famiglia
Eri dinù sempre ghjelosa
Ma di l’altri eri l’inviglia
O cuchjetta ti ringraziu
Ghjè per te ch’aghju u laziu…

Quandu lu tonu svuciava
Tù, trimava di paura
E in la casa entrava
Ombrosa di la natura
O mi manca a to tuntia
Dìmmi à quale un li piacia ?

Vita in casa un hè uguale
Senza a nostra prelibata
Ogni ghjornu lu murale
Si piglia una fucilata
O lu mio core hè struppiatu
Nanz’eru un omu sebbiatu

Avà so l’ultime rime
D’un più scrive mi dispiace
Ne aghju à l’occhji e lacrime
La mio suffrenza un si tace
O chì scelerata sorte
Di campà cun la to morte

Cusì bella puesia !
(ancu s'o devu palisà ch'ùn cuniscia micca fin'à tandu a parola "cuchja" ; grazie d'avèmmilla amparata).

Vi ringraziu, mi face piacè chi sta puesia vi tocca, aghju fattu stu lamentu cu e lacrime à l'ochjii cum'ellu si dice in l'ultima strofa

una puesia fatta inde u filu di a tradizione, u fattu ch'è tù sia un giovanu paghjillaghju ci hè per assai è , bravu!

una piccula rimarca:

ùn hè tantu ricca a rima lacrime è rime postu ch'ella hè sguillula a parolla lacrima (làcrima)

In una sistina d'ottupedi stice appena, moltu più chì in la nostra tradizione hè assai rara di truvà parolle sguillule in fin di versu.

Aghju digià fattu rimà lacrime è rime ma tandu hè ciò ch'elli chjamanu certi una rima nurmanda*

vale à dì rime pè l'ochji ma micca pè l'arechje cum'è in francese s'è tù faci "rimà" rimer incù mer



*http://www.forum.exionnaire.com/rimes-purete-rime-3696

CrispiLavighju a écrit:

Vi ringraziu, mi face piacè chi sta puesia vi tocca, aghju fattu stu lamentu cu e lacrime à l'ochjii cum'ellu si dice in l'ultima strofa

leghjiti què quand'è t'ai u tempu : https://isula.forumactif.com/t348-i-o-ii

Ogni rimarca hè bona à piglià, ghjè per me una manera d'instruissi è per guasi tuttu u mondu mi pare