Chjama à Sidussinchi

allora a t'aghju da dì
s'è ùn la t'aghju ancu detta
ti ne poi puru cullà
sin'à lu pozz'à cassetta
t'aghju da caccià da l'acqua
è poi tagliatti à fetta

una volta chì u focu
ghjè accatizzatu è callu
u to pesciu o sidussindu
sarà faciule à chjappallu
ch'aghju postu a mio reta
ghjustu à u Spin'à Cavallu

ch'e t'aspettu o sidussì
avà serà forse un'ora
pinsava ch'e tù falessi
da i pozzi di a Mazzola
ma quanti à mè sè più sottu
in l'Agnone o in Minchjufora

Caparrittu a t'aghju da dì
Avà ti sì palisatu
U locu duve campava
O sì tù chì l'ai zappatu
Ora mi trovu in un scornu
Vicinu à u Sbangatu

sappia bè lu mio amicacciu
chì cù mè ùn ci ai da sorte
ùn ci vulia à capulassi
per Sbangatu è Tondiforte
chì sì Branzale ti chjappa
ti manghja cù e carotte

Scusate s'e m'inframettu
E sì in ritardu sò ghjuntu
Quale hè chì di u sugettu
Mi vole fà u riassuntu
Caparittu o Sidussincu?
À quale u dò u puntu?

sidussincu a écrit:

Caparrittu a t'aghju da dì
Avà ti sì palisatu
U locu duve campava
O sì tù chì l'ai zappatu
Ora mi trovu in un scornu
Vicinu à u Sbangatu

una quistione cusì
ùn saria micca Tan di Forte?
(tana di forte)

a pisciaccia di sidossi
per ogni pozzu si piatta
à quand'u per Pozz'à Mattista
quandu per Pozz'à Ciavatta
ma si perde à ogni volta
hà bisognu d'una carta

o circione per u puntu
accordami stu piacè
vedi ch'in sta partitu
à cumbatte simu trè
s'è tu u mi dai ti ghjurgu
di spartemilu cun tè

Hè sempre listessa affare
Vedi ssa robba villana
Chì stuzzicheghja u pesciu
E l'hè pigliata a mattana
Aspettu lu tribunale
Per ottene a so cundanna

à circione: ùn la sò pò esse ch'è tù appia a ragiò
eiu scrivu cume l'aghju intesa, dunque otantu mi sbagliu ch'ùn l'aghju mai vistu scrittu

Quella pescia maladetta
In Golu l'aghju cappiata
Forse a t'avarà detta
Era digià infarinata
Ma avà quella s'intana
O ch'ella sgia annicata

à mè mi pare d'avè intesu Tan di Forte
è mi pare d'avè intesu ch'ellu ci era una grotta custì

ci vole à dumandà à Sidussincu s'ellu hè sempre sott'acqua...



ma lascemu corre
"cantemu"

Quella d'annigà i pesci
Què ghjè una novità
O ciarbelli inacquazziti
Pudete sempre pruvà
Videremu sott'à l'acqua
U più chì pudarà stà

d'aspettà lu tribunale
ùn vale micca a pena
a cundanna l'hà da fà
a natura senza sgena
à rombu di statti in fiume
t'hà da parà qualchì piena

Circione a écrit:

à mè mi pare d'avè intesu Tan di Forte
è mi pare d'avè intesu ch'ellu ci era una grotta custì

ci vole à dumandà à Sidussincu s'ellu hè sempre sott'acqua...



ma lascemu corre
"cantemu"

ùn la sò ci vole ch'e dumandi à Julien. sò chì a famiglia di Maddalena ci avia tarreni quaghjò, avà dice quellu, hè smaritu tuttu què.

Cosa hè chì ti stupisce
Eiu vogliu ch'è tù mi spiechi
Un pesciu chì magna e misge
Piglia i gattivi piechi
È ben ch'ellu sia pesciu
Ci vularà ch'ellu s'annechi!

ùn ti misura o caru
contr'à omi di qualità
sappia bè chì sott'à l'acqua
ore sane possu stà
invece tù ai bisognu
di u "Mascu" è u "Tubat"

Vi sbagliate tutt'à dui : u mio babbu mi dice avà : Tendiforte

v'aghju da dì una cosa
quessa o zitè ùn la socu
s'ellu ci vole à tende forte
o s'ellu ci vole à tende pocu
or'l'acqua ricopre tuttu
è ùn esiste più stu locu

Un esiste più stu locu
A storia era troppu bella
Avà femula finita
Chì spunta la prima stella
Lacatela dorme in pace
Quella corcia pisciarella

s'è tù t'addurmenti in l'acqua
carissimu pesciu anguilla
fà pianu chì di notte tempu
l'acqua corre forte è zirla
ch'è tù ùn appia à ritruvatti
dumane à u pont'à Castirla

Stu cuntrastu o cari amichi
Hè troppu in particulare
Stasera simu trè scemi
A intrattene u fuculare
Voi chì site in ste loche
Eiu aghju francu u mare

Sarà ora o Caparrittu
Ancu di spegne u lume
Ancu sì di pesciu frittu
Sintiamu u parfume
ma lascemulu nutà
Stanotte à mezu fiume...

hà francatu à Ponte Leccia
Ponte Novu è Casamozza
Sidussincu parte in mare
lasciendusi la so pozza
u tuttu hè ch'ellu ùn si fia
manghjà da una cagnozza