Chjama à Sidussinchi

Aiò spartimu stu pesciu
Ùn bardemu lu danaru
Ùn hè mancu vindarecciu
Chì saria troppu caru
Ci vole à dì ch'ellu hè maiò
Avvicina u cantaru...

Quì a descrizzione fatta
a mi pare bella amara
chì a pescia chì tù dici
ùn pò esse cusì cara
chì s'ella hè cusì maiò
tandu sarà piena d'aria...
:drunken:

O amichi ùn la cridite
Socu di pocu valore
Circione vi monta a sega
Corciu ch'o sò, o Signore !
Chjuculettu cum'è mè
Avèmmi lacatu corre !

sidussincu à un pesciu
ùn si pò paragunà
in 20 anni ùn l'aghju mai
vistu andà à nutà
andate à sapè o ghjente
s'ellu hè in capacità

v'assicurgu a vi dicu
ci hè una ragione à fassi
ùn l'aghju mai truvatu
nutà à l'ombra di l'alzi
s'e vo lu lampate in l'acqua
hè capace d'annigassi

à Sidussincu:

À quale voli fà crede
O caru simule affare
U ritrattu fallu vede
Chì e cose sianu chjare
Tù ùn sè pescia di fiume
Piuttostu pesciu di mare

À Caparrittu:


Amicu cù e to canzone
Perchè ghjetti tantu fele?
Fà piuttostu cum'è Circione
Chì in bocca ùn hà cà mele
Sidussincu sà nutà
Nu i pozzi induv'ellu hà pede.

anderaghju avà à dorme
ma un'ultima vi facciu
a vi palesu avà
parlendu di l'amicacciu
ùn hè un pesciu di fiume
ellu hè un cagnacciu

l'affare di sidussincu
hè un veru paradossu
ùn hè di fiume ne di mare
ghjè un vechju pesciu rossu
chì campa in un buccale
nant'à la madia ripostu

solu in lu so caraffone
si ne ferma ciattu ciattu
l'altru ghjornu anc'un pocu
u si manghja u mo ghjattu
per ch'ellu ùn lu tocchi più
nantu ci aghju messu u piattu

Sidussincu Sidussincu
S'è tù passi per isse sponde
Cù u versu Niulincu
Veni puru à risponde
chì per quant'aghju capitu
Tù noti per tutte l'onde

(à Circione...)

Un n'hè quistione di taglia
Hè chì ùn sò sparmintatu
Stasera ne date prova
A ogni colpu tiratu
Per pudè risponde à tutti
Un n'aghju abbastanza fiatu

Ch'ellu ti manca lu fiatu
O amicu hè un fattu
Caparrittu hè sgalabatu
O forse appena distrattu
Ch'è tù possi rispirà
Ch'ellu ti cacci stu piattu

M'ete attaccatu tarrore
Accurtate i funarali
Pesciu di pocu valore
Inturniatu di squali
Chì pò fà un amatore
Contru à i prufessiunali ?

s'e sò un pocu sgalapatu
o circiò sè simplicione
ùn ti sì micca accortu
chì nant'à lu caraffone
ci aghju fattu un'apertura
per fà climatisazione

vecu ch'in stu caraffone
tù ne ai una techja
allora un'di sti ghjorni
piglienduti per l'arrechja
per cambià di dumiciliu
ti metteraghju in la sechja

Aiò femula finita
Eppo cacciami stu piattu
Chì per francalli a vita
Ùn emu zifratu pattu
Dimuli à bona notte
Lascemulu cù u ghjattu...

State à sente à Caparrittu
L'amicu di l'animali
Chì ci face i tafoni
Climattizzeghja i buccali
O s'è tù pudia fà
E cose cum'è tù parli

s'ellu ùn era ch'hè lu ghjattu
c'hè u mo cuginu d'ottu anni
ch'hè una pesta finita
dettu francescu ghjuvanni
l'hà lampatu in la mascina
quella per lavà li panni

(A Circione)

Sò d'accusente cùn tè
U to discorsu hè fundatu
Poi puru alzà u ditu
Per stasera hè terminatu
Ma ancu per esse pesciu
Oghje quantu aghju piscatu !

ùn fà tantu lu malignu
u mio bellu pisciarellu
lu to avvene hè meiu
hè forse più cusì bellu
chì s'è tù cuntinueghji
ti sfrumbulu in barcalellu

Stasera mi sò campatu
Ma avà spengu lu lume
U pesciu ch'avia piscatu
Benchì di un certu vulume
Per piscallu un'antra volta
Avà u righjettu in fiume

dormi bè o sidussincu
forse ùn ti rendu serviziu
scusami s'e sò un omu
malsanu è pienu di viziu
ma avà ti cacciu lu piattu
è ti lasciu cù lu misgiu

ùn si sà mai in la vita
forse ch'è tù ci ai da sorte
scusami s'e a ti dicu
ma e carrotte sò cotte
vidaremu dumatina
in tutti in casi bona notte