Chjama à Sidussinchi

M’arvecu chì Sidussincu
E so cruzie hà francatu
U ghjattu di Caparrittu
Ùn lu s’hà micca magnatu
Eppuru u caraffone
Era bellu sculifatu

Pigliu una lenza morta
Cù u polpu affumicatu
Cù una frasca di morta *
Chì murza ùn n’aghju truvatu,
Per piscallu un’antra volta
U pesciu ch’aghju cappiatu.




*

https://isula.forumactif.com/t16-pesca-a-a-murena

V'aghju à palisà qualcosa
E d'avanzu mi ne scusu
U micidiu d'arrisera
Un rispetta mancu l'usu
Quant'à mè rullate inseme
Pè ssu scemu di Nihussu

òimè ciò chì m'accade
ùn fendu micca attinzione
u bruttu di sidussincu
s'hà ingulitu u mo misgione
ch'ella li ghjunga u frusciu
è morga d'indigestione

o latru di sidussincu
ch'è tù brusgi in li to panni
culpevule d'assassignu
cagione di tanti affanni
avà chergu à u sgiò ghjudice
'llu t'arresti è ti cundanni

Aveteli mai visti
O ghjente simuli fatti
In fiume ci sò l'artisti
Pesci chì magnanu i ghjatti
S'e pigliu a piscaghjola
Ci vularà ch'ellu si piatti

Cù ghjente simule à voi
A Corsica si stà bè
Intuscate fiumi è pozzi
Solu per vostru piacè
U partitu di li pesci
U cunvocu intornu à mè !

A cundanna sarà dura
Per ùn dì micca murtale
Ancu sì a magistratura
Hè riprisintata male
Capite chì ùn parlu micca
Di ghjudici in generale...

Ci vole chè a vi dica
Site appena uriginali
Cum'è s'ella ùn vi bastava
Di vince n'i fiuminali
Inventate ancu i fatti
Pè ingurgà i tribunali

Appruntà vogliu e rete
E lenze è e piscaghjole
U ghjattu capisciarete
Chì vindicallu ci vole
Ch'elli sterpinu i pesci
Da E Teppe à E Mazzole!

A socu chì a mio razza
L'ete cundannata à morte
E la musa hè più chè pazza
Chì e face sempre torte
Ma cù mio novu partitu
Pensu mi n'aghju da sorte

U partitu ùn bastarà
Cunnoscu tutte e tane
È t’aghju vistu nutà
In l’onde di e Mizane
È ancu appena più in là
Pè e Vigne Cappillane.

Ora fà casu o Circiò
Duve tù metti u pede
Quessi sò i mio tarreni
Custì ùn poi cumpete
Perchè l'aghju sempre in casa
L'attu fattu da u prete

Di l'attu di u to prete
E mio muse ùn sò suddesfe
À mè lasciami scumpete
Cun quelli di l'EDF
S'e biutemu u matrale
Magnemu pesce à buzeffe

Chì mi pò fà l'EDF
A ti dicu o Circiò
Poi piglià tutti i pesci
Ma mi tengu a ragiò
Un la sai ch'hè difesa
Di piscà cù a dinamò

Pescu incù a dinamò
Qualchì volta incù a Javella
Chjappu e pesce maiò
Vicinu à a Virgulella
È ancu appena più inghjò
Quelle di a Pinzutella

Pesca induv'ella ti pare
Faci puru lu to dannu
Indù le mio sponde care
Ci ai messu lu malannu
Ma lu prete, da l'altare
Duppiarà la to cundanna

Avà mi ne vocu à spassu
Nun possu più stà sarratu
Piglieraghju un antru chjassu
Perchè lu pozzu hè intuscatu
Pè l'udienza di stasera
Circaremu un avucatu

Pocu impreme induv'è tù pigli
O pocu hè u t'affare
Stà à sente i mio cunsigli
Oghje statti à u Linare
Ma stasera à l'annuttà
Falatine sin'à u mare...

scusate ma era in bastia per a ghjurnata

vogliu andà in gendarmaria
hè pone una lagnenza
poi piglià un'avucatu
pè ùn lacatti alcuna scenza
ch'ella sia brutta è cruda
di lu ghjudice a sentenza

una strace cum'è quessa
ùn si sarà mai vista
per avè manghjatu à misgiu
caru per ch'è tù capisca
ch'è tù morghi avvilinatu
in l'acque di Pozz'à Mattista

A t'edea per lu pesciu
Vecu ch'hè pocu pietosa
Avale di u villenu
N'aghju avutu a mio dosa
Or lasciu Pozz'à Mattista
Per fughje in Pozz'à Rosa

avà vecu o caru amicu
ch'è tù sè un pesciu sgualtru
u Pozz' à rosa a ti dicu
si trova assai più altu
ci hà da vulè u mio bellu
ch'è tù spicchi un grande saltu

Ci ai vulsutu fà crede
Chì m'avia manghjatu a ghjatta
Cumu hè ch'ellu ti stona
U pesciu quant'ellu salta
E mi cerchi in Pozz'à Rosa
Quandu sò in Pozz'à Ciavatta

ùn t'aghju manghjatu ghjatta
ne mancu manghjatu fica
ch'è tù sia per l'Agnone
o puru in la Verga Antica
t'aghju da chjappà listessu
è manghjatti à l'arrustita

Per manghjammi à l'arrustita
Appronta puru lu focu
Quand'avarei finitu
Un mi truvarei in locu
Tù scumbatti per l'Agnone
Sò digià in Martafocu