Chjama à Sidussinchi

Eiu ùn facciu lu malignu
È a mio rima hè sincera
È malgradu quellu ardignu
A muca sarà ligera
Ma s'è t'ai a sciringa
Hè chì faci a infirmiera?

infirmiera ùn sò micca
è ti svelu u mio sicretu
sò duttore diplumatu
è ogni tantu puetu
ma s'è tù cuntinueghji
t'aghju da zingà lu daretu

Ma quessa per mè hè un ghjocu
Ùn temu a to piccatura
Saparè chì in quellu locu
Aghju a pelle bella dura
MA quessa hè cum'è a musa:
Hè un donu di a natura

avà vecu veramente
ch'ai bisognu d'appoghju
sò sicuru ch'ùn frasi mai
l'acqua di u lavatoghju
chì indurisce la to pelle
inquant'à mè ghjè u coghju

Cum'è tù sè maldicente
Ti cridia più curtese
Davanti à tutta la ghjente
Tù mi lampi tant'offese
A pelle in quellu locu
A lavu una volta u mese

inquant'à mè o circiò
campi sempre à l'anticognu
d'una bella pulizia
avaristi ancu bisognu
invece d'una volt'à mese
lavati una volta à ghjornu

Ùn hè micca per sta sera
Ch'è tù mi metti a trava
Aiò chì ùn hè micca vera
O caru ti macagnava
A sai bè chì Circione
Tutti li ghjorni si lava

Ma vultemu s'è tù permetti
À u sugettu iniziale
Perchè ci sì sugetti
Chì ponu finisce male
Ghjugnarà à fà rispota
l'amicu cuntinintale?

Allora torna vi chjamu
Chì ognunu risponde possi
Azzingu u lumbrice à l'amu
È ciottu a lenza in Sidossi
Spirendu di piglià in Golu
Dui pesci di i grossi

sò bè chì cù u savone
a to persona si struscia
ma avà vò ind'è amichi
à sparte appen'di manghjusca
dunque innanzu di parte
m'aghju da piglia una duscia

à prestu !!

inquant'à u sidussincu
a mio persona hè inchieta
per risponde à la to chjama
quellu pesciu ùn si disceta
s'ellu ùn basta a piscaghjola
cacciaremu ancu a reta

Hè vera chì u to parente
Mancu si dà di rimenu
Ghjuntu ch'ellu hè in cuntinente
À noi ci pensa menu
Ma s'ella ùn basta la reta
Mittaremu lu vilenu

Ohimè a scopru avà
Ssa surpresa chì mi fate
Mi ghjughjenu nu u spinu
I colpi chè vo' tirate
Ma s'è l'animale ùn c'hè
Vostre cartuccie e guastate

Ma lu più chì mi stumaca
Hè di vede à Caparrittu
S'è vo a mi dumandate
Palesu lu so delittu
Chì s'hè messu cù Circione
In brama di pesciu frittu

Quì si tratta di piscà
Ùn frazemu carcatoghja
Tu ùn sè pussutu stà
Senza morde a imbuccatoghja
Avà sè infarinatu
È prontu per la frissoghja

Sì sta sera ùn l'ai vistu
In celu ùn ci hè micca luna
Scappa puru o Sidussincu
Vita n'avemu cà una
S'elli anu toscu è reta
Avaranu ancu a cugna

M'ai chjappu, a ricunnoscu
Ma micca cum'è tù dici
Chì c'hè vulsutu u toscu
- Un si face trà amici ! -
Avà la ti pregu bona
Un l'ai ancu à digerisce

Ringraziu à l'amicu Erbaghju
Chì m'hà vulsutu salvà
Hà fattu cume pudia
Ma mi sò fattu chjappà
Chì sò un pesciu nucente
Tuttu lu mondu a sà

A l'amicu Sidussincu
Dalli un cunsigliu vogliu
Scappa l'affare và male
Eppo civa per l'orgogliu
Ch'appruntata hè a frissoghja
È pare caldu ancu l'oliu

U cunsigliu di L'Erbaghju
Perchè ùn l'ai statu à sente
Avà pesci n'aghju un paghju
Possu ancu invità ghjente
Hà ragiò ciò ch'ellu dice
Mirà, chì l'oliu hè bullente.

D'avetti infarinatu
Ti prisentu e mo scuse
Eiu s'e t'aghju piscatu
Fù per pasce e mio muse
Elle magnanu i pesci
Sani sani incù e cruzie.

L'affare sò in francese
A ti dicu senza scherzu
Eiu per manghjà e pesce
Sempre aghju messu u prezzu
S'ellu hè cottu Sidussincu
Vengu à manghjammi un pezzu

Sidussincu hè pesciu grossu
Ùn hè micca una saracca
Dattine un pezzu nun possu
Perchè vogliu fà a sbacca
Postu chì metti u prezzu
Ne sarè di a to stacca.

I cridiu più curtesi
I pueti di Niolu
Tù a mi voli fà crede
Ch'ellu nota sempre in Golu
Ma l'aghju capita bè
Chì u voli manghjà solu

Chì vulete ch'o vi dica
Site omi di spilonche
Un n'ete mancu pietà
E lische sò digià tronche
Avale vi lasciu soli
Chì eiu facciu e conche

A mi pare chì sta sera
Mancu a notte ti piatta
Chì Circione in puisia
T'hà propiu datu a to fatta
Chì mi pare u to pozzu
Avà hè a so pignatta